NFA, siniguro ang supply ng Iron-fortified rice

Written by Lizel S. Macatangay | 23 December 2011

PILI, Camarines Sur, (PIA) -- Upang labanan ang malnutrisyon, siniguro ng National Food Authority o NFA dito sa lalawigan ng Camarines Sur, na mayroong sapat na supply ng Iron-fortified rice (IFR) ang mga pampublikong pamilihan.

Kinumpirma ito ni NFA Camarines Sur assistant provincial manager Nora Folosco sa isang panayam. Ito ay alinsunod na rin sa kautusan ng Malakanyang na mapaunlad ang kalusugan ng bawat mamamayan sa pamamagitan ng pagbabawas ng kaso ng malnutrisyon sa mga lalawigan.

Matatandaan na ang Camarines Sur ay isa sa mga lalawigan na may mataas na incidence o kaso ng malnutisyon, partikular sa mga bata na may edad dalawang taon pataas. Tinututukan din ng nutrition program ng pamahalaan ang mga pre-school children, maging ang mga mag aaral sa elementarya na nasa malalayong barangay na mapataas ang kanilang mga timbang.

Ayon rin sa pag aaral ng United Nations Children’s Fund o UNICEF, isa ang Bikol sa tatlong rehiyon na nasa priority ng pamahalaan upang matugunan ang problema sa malnutrisyon.

Bunsod nito ay mahigit 11,000 bags ng iron-fortified rice ang ibinagsak sa malalaking pamilihan dito sa Camarines Sur. Idinagdag pa ni Follosco na nitong nakaraang tatlong buwan ay nag laan ng 34,655 bags ng “Iron-rice” sa Bicol, kung saan 10, 950 bags dito ay ipinamahagi na sa mga pamilihan sa Camarines Sur hanggang ngayong buwan ng Disyembre.

Ang IFR ay kombinasyon ng premixed fortified grains at ordinaryong bigas. Ang isang araw na kunsumo nito na mula apat hanggang anim na tasa ng nilutong IFR ay sapat upang makamit ang iron requirement ng ating katawan.

Ito ay nakakatulong din upang mapalusog ang mga red blood cells, madagdagan ang pisikal at mental na abilidad, at nakakatulong upang maiwasan ang anemia. (MAL/LSM-PIA Camarines Sur)