|
14 February 2012
LEGAZPI CITY - Dai na ngonyan maagihan an nagkapirang dalan pasiring Camarines Sur asin Tiwi sa provincia nin Albay matapos na mairehistro an nagkapirang pagrasay nin daga sa lugar.
Sa report na ipinaabot kan Department of Public Works & Highways (DPWH) Bicol, na paramientras munang dai maagihan an mga dalan partikular sa parte kan Brgy. Sugod Tiwi Albay huli sa pagrasay kan daga dara kan padagos na pag-uran puon pa kan mga nakalihis na aldaw.
Aminado man an nagkapirang tauhan kan naunambitan ng ahensiya na nadidifisilan sinda sa piggigibong clearing operation huli sa padagos na pagrapado kan makusog na uran.
Katakod kaini, pinagirumdom man kan lokal na gobyerno sa Albay an mga barangay official na maging alerto asin tulos na i-ebakwar an mga residente sa saindang nasasakupan kun may nahihiling na huma sa saindang salvacion kontra sa landslide asin mga pagbaha.
