Information Bill

Written by BPNews Team | 28 October 2011

Basado sa tenor kan panaramon ni P-noy kaining nagtalikod na aldaw sa media, nagluluwas na minadistansya na ini sa isyu kan "freedom of information bill" sa kaibong kan paglapigot kan nagkakapirang sector na masertificaran ini bilang urgent bill.

Maging ang saiyang mga kaalyado na nagbubusol kaini sa kongreso asin senado nagpahayag nin dikit na pagkadisperar nin huli ta saro ini sa saiyang advocacy durante kan kampanya sa eleksyon kan nagtalikod na taon.

Saro sa mga rason kan presidente iyo na posibleng maabuso soboot ang proponidong lakdang na ini kan mga benepisyaryo sa ngapit na panahon, partikular ang mga opurtunista na posibleng gamiton sanang padatulan ini tanganing makapangratak nin persona asin institution. Kaipuhan pa soboot nin magkakanigong pag-aadal sa bagay na ini tanganing maging komprehensibo ang magiging implikasyon sa publiko asin sa gobyerno.

Ang freedom of information bill, sarong kalasag kan mga advocates nin transparency of governance kung saen magkakaigwa nin mahiwas na access ang publiko sa mga transaction kan govierno, partikular sa implementasyon nin mga proyekto. Dakula man ang magiging papel kaini tanganing mapuho ang korapsyon nin huli ta madakul ang mga vigilanteng grupo na mabantay sa mahika kan mga beterano asin batikanong majekero sa man laen laen na ahensya kan govierno.

Sa kaibong na lado, may punto man ang presidente nin huli ta dakul sa Pilipinas ang mahilig mag-opurtunisar asin mag-abuso sa saindang mga libertad sa pag-ehersisyo kan deretsu, partikular ang mga persona asin grupo na ang misyon sa buhay manratak sa dignidad nin ibang tawo.

Guirumdumon ta mga kaperyodiko na ang gabos na deretsus igwa man nin mga kolatilya, limitasyon asin mga kondisyones. Maging responsable sa pag-avelar nin satong deretsu nin huli ta dai man nin inaapod na absolute right.

" The rights of an individual ends, when the rights of another individual begin".