Tuwad na daan

Written by BPNews Team | 15 October 2011

Kung si P-noy grabe ang pulos-pugos para sa kampanyang "tuwid na daan", pero sa ibang ahensya baliktad nin huli ta ang sinusunod "tuwad na daan".

On going ngonian ang imbestigasyon sa 682 million circumferential project na maabot sa 29 kilometro pasisiring sa Caramoran na alegadong igwa nin misteryong nangyari sa mga nangganang bidders.

Ang source kan expose iyo ang legal officer kan DPWH region 5 na si Atty. Oliver Rodolfo, basado na man sa pakikipagtabangan kan United Katandunganon Against Graft and Corruption (UKAG).

Luminuwas ini sa duwang Peryodiko national kung saen alegadong igwa nin maabot sa 170 milyones de pesos ang kantidad na posibleng naitaltag sa man laen laen na opisina komo SOP o padulas.

Alagad ang gabos na ini pinahimutikan ni Engineer Ignacio Odiaman asin nagtau ini nin asigurasyon na bukas ang saiyang opisina maging mga dokomento sa anuman na imbestigasyon kan magkakanigong ahensya.

Sa mga nakaaguing panahon, bako sanang 20% ang nagiging tipak sa mga proyekto sa mga national road nin huli ta minaabot ini nin sundo 50 porsiyento. Ang 20% medyo makadiyos pa man kung tutuusan, alagad whether sadit o dakula parehas na igwang bahid korapsyon ang sistemang ini.

Sa bagong administrasyon ni P-noy, kung magiging partisipado sana ang publiko arog kan man laen laen na sector arog kan UKAG, dakula ang magiging tabang kaini tanganing maprotihiran ang interes kan publiko asin dai matintaran ang mga nanunungdan na imbwelto sa pagpatrabaho kan mga proyektos.

Dapat isipon kan mga nanunungdan ang legacy o marhay na akomplisimiento asin bako ang makukuang porsiyento.