Palarong Bicol 2016

FB-EYE
Typography

Nagtulak na sa Naga City ang delegasyon kan Catanduanes para sa sarong semanang Palarong Bicol 2016.

Siyempre, panibagong pangarap asin panibagong laban para sa kampeonato o haruhalangkaw na runner-up, kung aabuton nin kapasidad basado sa limitasyon kan pondo, atleta asin iba pang resources.


Kung kaidto, perming nasa pedestal ang Catanduanes sa kampeonato, basado sa report ngonian kan BP, ikalima na sana ang pangarap kan satong delegasyon. Kung sa ibang delegsyon, kampeonato ang bukambibig, kita komportable na sa panlima, basta bakong ikapurit.

Sa puntong ini, nagpapakatotoo sana man ang satong mga opisyal kan DepEd, kaysa, sabi kan mga gurang, “halangkaw na pangarap hababang burikat”. Sa tagalog, mataas na pangarap, pero mababa ang lipad”.

I beg to disagree sa phrase na ini kan mga gurang nin huli ta kabaliktadan ini sa sakong forte. Ang sakong paninindugan, kung mangarap ka man sana, mas halangkawan mo tanganing, kung dai mo man maabot, atleast nasa halangkaw na lebelo lamang.

Ang ehemplo kaan, kung nangarap ka nin sarong milyon, posibleng kung trinabaho mo maabot mo ang kabangang milyon, kaysa nangarap ka nin kabangang milyon, inabot mo sangkatos mil sana.
Ang boot tang sabihon, dapat ang panindugan asin pangarap man kan satong mga opisyal sa DepEd halangkaw asin bakong “settle for less”. You must go beyond the limit of your imagination.

Medyo disganado ako kung ikalima sana ang pangarap na pwesto samantalang gabos man delegsyon dai man nakakasiguro. Sabi ngani, bilog ang bola. Posibleng dakul sindang resources, alagad, bako nindang panahon ngonian asin dinaog kan mga paluypakoy, pero determinado na makua ang kampeonato.

Ano daw kung pareho man kan sports coordinator ang pangarap kan bagong tukaw na Superintendent kan DepEd sa Catanduanes? Kung pareho, magbalik guiraray siya sa Sorsogon ta dai kaipu kan Catanduanes ang bakong palaban.

Sa taon taon na kompetisyon sa Palarong Bicol, gare permi na sana kitang problematic sa kakapusan nin pondo, kakapusan sa training asin limitadong preparasyon. Ano ini, mga alibi o talagang pinapabayaan na sana asin daing nakukuang solusyon.

Kung ang mentalidad kan satong mga opisyal sa DepEd, perming kulang, eh dapat siguro, mag-alsabalutan na sana sinda tanganing tukalan nin mga bagong pandok.
Ang mga players, kung inspirado sa mga coaches asin mga opisyal, halangkaw ang estamina sa kawat maski kulang sa papa.

Tandaan ta na ang saindang trayumpo bilang atleta, bako sana akomplisimiento kan eskwelahan, kundi personal ining laban. Orogolyo para sa sadiri asin orogolyo nin pamilya. Eksperto sa motibasyon nin players ang kaipuhan ta sa DepEd asin bako ang mga perming naghahanap nin kulang. Sa ano man na bagay daing minasobra. Sa kakapusan nin resources, minaluwas ang tunay na leader asin tunay na Oragon!