Summer Break

FB-EYE
Typography

Congratulations sa mga organizers kan Catanduanes Reef Break (CRB) sa espwersus na buhayon ang Majestic Puraran Beach Resort sa arog kaining summer vacation.


Ang Puraran surfing area, ang saro sa pinagmimirar na tourist spots sa nacion na dai makabwelo sa saiyang potential nin huli sa kakulangan nin continuity sa mga aktibidad.

Narurumduman ko na pinunan ini sa panahon ninda Gobernador Jun Verceles asin Mayor Bong Teves kung saen, harus naimbitar sa probinsya ang mga international surfers maging mga national surfers kan nasyon.

Lugod sa paagui kan CRB mamantinir ang suporta kan mga ahensya de govierno asin dagus na maipabisto ang Catanduanes sa ibang lugar. Kudos sa brainchild kan CRB, ang depuntong si Ezra Efondo. Sa saiyang espwersus napunan ang arog kaining summer activities asin ipinagpapadagus ngonian kan tugang na si Genesis Efondo sa partisipasyon kan man laen laen na grupo.

Kan nasa Bombo Radyo Legazpi pa ang saindong lingkod taong 1998, pirmi tang nakakaulay sa mga ideya kan turismo sa rehiyon si Regional Director Nene Ravanilla kan Department of Tourism (DOT) manongod sa potential kan Catanduanes sa surfing competitions. Segun sa Director, saro sa mga potential showcase kan probinsya nin huli sa pagiging popular kan kawat na ini sa mga foreigner. Dai lang nasustinir sa mga nagsunod na administrasyon kung kaya naglipot ang promotion. Saro ining showcase kan probinsya sa international scene na dapat tawan nin magkakanigong atensyon.

Kompletong pasilidad, proper maintenance asin dakul pang pagpaplano kung papano maipromotir ang mga tourists potentials kan Catanduanes, particular sa Puraran ang dapat tawan nin atensyon kan local na govierno kan Catanduanes.

*************
Posibleng maging stand bearer kan administration si Senador Grace Poe sa paabuton na eleksyon. Sa ibong ini kan pagbusol kan Liberal Party na iwagayway ang pangaran ni DILG Secretary Mar Roxas na padagus na dai makausad sa mga political surveys.

Kung dai madara sa presenting estratehiya kan administrasyon na padaplaon ang popularidad ni VP Binay, daing choice ang LP kundi tambudan si Poe komo presidentiable na magiging kulog payo kan grupo ni Binay.

Saro sa scenario na satong naheheling, ingkaso idagus ang kandidatura ni Roxas magiging mismatch ang laban asin dakula ang tsansa na si Binay ang manggagana.

Mientrastanto, worst scenario sa parte ni Binay kung maging Presidente iyo ang kakahampangon na impeachment proceedings, particular kung ang makapot sa House of Representatives kadaklan mga lehislador hale sa Liberal nin huli sa sangkatutak na akusasyon na iginagapo saiya asin sa saiyang pamilya.

Sa puntong ini, kung magtrayumpo ang impeachment, presidente man guiraray si Poe, kung mangganang bise presidente.

Intonsis, manggana asin madaog, namemeligrong masuprer si Binay nin pinakamatinding pagsubok sa saiyang buhay. Sa ibong na lado, worst scenario ingkaso dai makaluwas na presidente si Binay iyo ang patung-patong na criminal case sa mga regular courts nin huli sa mga akusasyon nin kurapsyon.

Sa ngonian, nakakabentahe si VP Binay nin huli sa saiyang immunity from suit komo impeachable official, alagad ingkaso dai makalusot sa eleksyon, magiging miserable man guiraray ang saiyang buhay.

Sa mga pronouncement ni Poe kontra ki Binay, naheheling ta ang scenario na palaban na ang senador kabaliktadan kan nagtalikod na mga aldaw na habong tungkusan ang posibilidad na maging saro sa pinakahalangkaw na opisyal kan nasyon.

Ini ang political set-up sa Pilipinas, kanya-kanyang basagan nin pandok ingkaso harani na ang eleksyon, kabaliktadan sa Estados Unidos na minabase sa integridad asin plata porma de govierno ang debate.

Sa amay na pagdeklarar ni Binay sa saiyang kandidatura, namate niya ang disadvantage. Ini man ang naging kapalaran ni dating senate president Manuel Villar na sa ibong kan popularidad, mga imbestigasyon sa senado ang nakauyag nin huli sa mga personal na agenda.